وليف الروح..!

اسرح مع افكاري والقلم ظامي 
                         عل القلم يروي من جوف بيري
لمن تذكرتك وهاك اللثامي
                     اسج انا بوصفك وفكري يحيري
انت وليف الروح وغاية مرامي 
                        وبقربك انا يابنت نومي قريري
سر ياقلم بالخط واشرح غرامي 
                         وعبر عن المكنون بخافي ضميري
اكتب بحبر الشوق ووزن كلامي 
                           وانسج حروف الوله نسج الحريري
بين له اشواقي ووصل سلامي
                           قله ترى المشتاق امره خطيري

الضيــقه..!

مشين من الضيقه وطول الليالي
                          وهموم قلبي تنصب خيامها
مدري وش اللي صار ياوش جرالي 
                          من حزة الضيقه وجرح اسهامها
ليت الوليف اللي تغلى صفالي
                        وهون على روحي شقاها والامها
ياليت منهو صغيرا وسالي
                     ماتحزنه دنياه وشر ايامها

عــزآهـ..!

لصار عندك صاحبن لك يخونك
                         عزااه وانت معطي القلب يمناه
وشلك بحبن صاحبه مايصونك  
                         في غيبتك يفرح وينسى ماحكيناه
يقول انا وشلي بناسن بدونك
                       واللي تشوف العين شين ماهقيناه
لصار ماهو صاحبن يبعد ضنونك 
                          ولمن غواه ابليس بالشر ينهاه
خله يولي جعل ربي بعونك 
                          ويكفيك ربك شر  هذا ودنياه

دنيآ عجيبه..!

الله من قلبن تلوفه لهايب
                          من حر مايوجس تنكر  محله
كنه على جمرا  تحوفه هبايب
                           واقلبي المجروح من ماحصله
تنكر الاقرب هم والحبايب
                           واول اشيل الحمل حملي وحمله
ياما على شانه نفك النشايب
                          نصبر على الزلات كله رضنله
والدم في عرقي من دام شايب
                          والحر منزاله على الحر مثله
يقطعك يادنيا تجيب العجايب
                        ياذا العجب يوم انكر الخل خله 

أحرص على آلغآلي..!

الله وحده عالم القلب ومافيه    
                       يعلم خوافي الصدر ومايكني
والظن ظن السوء ماادانيه 
                       وقلبي على الطيبه دايم يظني
لاتشتغل بالقلب وشهو خوافيه
                        تكثر هواجيسك وفكرك يوني
ماينفعك لصرت تبحث مساويه
                         وشلك بعلم الغيب وكثر التعني
اترك قلوب الخلق وكلن وراعيه
                        مايصدق الهاجوس بكثر التمني
احرص على الغالي واحرص تراضيه
                         لاتخسره بالظن وظلم التجني

الــروح روحــك..!

ياحزه الضيقه اللي غشت صدري  
                           وشلك بقلبن هموم الوقت حاشيته
لضاق صدري ترى ياناس لي عذري
                            قلبي على فزته اضلوعي حاميته
الوقت كدر حياتي والشقى بدري  
                             طفلا صغيرا هموم الدهر راميته
ياللي على شان قربه نتلف العمري
                               ارفق على من صدوف الوقت واطيته
ياللي بدينك جروحي بلمستك تبري 
                              تكفى ترى الجرح ينزف ليه خليته
الروح روحك ودمك في الجسد يجري 
                          والنبض نبضك وقلبك في الصدر بيته
انا حياتي عليك اليوم لو تدري 
                              الحق حبيبك قبل ياليت وياليته
ترى حبيبك عليلا والجسم مبري
                           والموت يطوي سجله كان ماجيته
واذا قضى ربي الموت وانحفر قبري 
                             ابكي على قبر خلك كان مريته

رحمـــآك ربــيّ

تمشي بنا الايام والوقت ساير
                      يقفي نهار اليوم ويظهر تبيعه
نلهى في هالدنيا والكل طاير
                        كلن يبي دنياه تاتي مطيعه
نهمل حقوق الله والحق جاير
                      ننسى نعم ربي وننسى صنيعه
رحماك ياربي قبل الحساير
                            بامرك ترد الروح مثل الوديعه
رحماك في يومن الكل حاير
                       يوم  تجيك الخلق تمشي مٍذيعه
يوم الحساب تبين وش هي الخساير
                          يومن تشيب النفس لو هي رضيعه
يومن على الظالم تدور الدواير
                                 يندم على فعله وذنبه يذيعه
يارب ياعالم  مافي الضماير
                              يامن خلق بامره نجومن رفيعه
ياعلمن بالحال وخافي السراير
                                يامنزلن غيثه ومظهر ربيعه
يارب انا جيتك والذنب صاير
                                بنيت انا بذكرك حصونن منيعه
تغفر لي الزلات والقلب ثاير
                               عطفك علي يارب يوم الفجيعه
اتوب من ذنبي كبار وصغاير
                                 والله كريم ورحمة الله وسيعه

اللي عطانا الحب لابد نعطيه..!

لصار لك خل (ن) يحبك وتغليه
                             تخيل لك الدنيا ويقدح سناها
وابشر بمزنن يابس الغصن تسقيه
                              تروي عروق (ن) بالصدر من ضماها
يهتز قلبك واخضر الروض تجنيه
                                   مرابع (ن) بالخير ياكثر ماها
يروى بها العطشان من يد ساقيه
                             ترياق ريق (ن) حالين من حلاها
يستانس الخافق وتثمر معانيه
                          ببيات شعر (ن) فكري اللي بناها
الله يازين الهوى وزين طاريه
                      ويازين روح (ن) ترتحل في هواها
تتبع وليف الروح والروح تبغيه
                           وقلبي بعد مجنون يتبع اخطاها
قلبي تبع عشقه وهذي هقاويه
                          ابيع عمري في سبايب رضاها
يرتاح قلبي لحظن قلب غاليه
                               روايع العشاق في منتهاها
لمن فقدته اتحرى حراويه
                          ولغاب عني ليلة (ن) ياعناها
اللي عطانا الحب لابد نعطيه
                           نوفي ولو شحت علينا سماها
لو يطلب الغالي والروح تفديه
                        ويالله عسى روحي توفي جزاها
ترى الغلا يوفي الى صرت توفيه
                         وكايد على الخاين يلحق وفاها
الشاهد الله ماسمعت الحكي فيه
                            ولاني على ماقيل ادور خطاها   
يارب لاتقطع رجاء(ن) فيه نرجيه
                          ويالله لاتخيب فيني رجاها
هذا أناعشقي وهذي حكاويه
                  وكم واحد(ن) له عشقتن ماقواها

يـــآ آبـــــوي...!

   لاضاق صدري لذت عالي المراقيب    
                               ادور اللي يبعد الهم عني
تالي نهار اليوم والشمس بتغيب            
                        شبيت ضوي بـ الظلام المكني
وجريت صوتي فوق هاك المصاليب         
                       من مايجول بخاطري وامتحني
اسلي الخاطر وبصدري لواهيب           
                    بآبيات شعر ليت منهو سمعني
ارتب ابيات على القاف ترتيب      
                           ترتيب منهو للقصايد يحني
في صحصح خالي ولابه مجيب     
                     غير الذياب اللي بعواهن جاوبني
(الذيب لمن عوى جاوبه ذيب)          
                         ونوح الذيابه بـ الخلاء هيضني
ياذيب حاورني واحاورك يا ذيب       
                         ونبدي علوم في الصدر حيرني
ان كان تشكي الجوع والضيم يا ذيب   
                       افرس بنابك وخل عنك التمني
وان كان تبكي فراق خلك فلا عيب     
                        كلن على فرقا خليله يوني
وان كان مغتاض من الوقت يا ذيب    
                     ليت الليالي للورى رجعني
الوقت شين والليالي بها ريب          
                   والدهر زايل والمنايا يجني
ليت الهبايب تنقل العلم وتجيب        
                      وياصل سلامي والتحيات مني      
لشيخ على مركاه كلن له يهيب           
                  له كلمة في مجلسه ماتثني
طبع الكرم طبعه وهو منبع الطيب         
                   وربعه على مدة يدينه تظني
ياكثر مايعطي بـ حق المواجيب          
                  ذخاير الخطار ولايرهقني
ومنك العذر يابوي وانت ترى مصيب      
                ياحزامي اللي بالشدايد سندني

للحـب لـــذهـ..

ياصاحبي ماني على الغدر ناوي
                               ولاني على كثر المحبين مشتاق
ولاني على فرقاك يابنت قاوي
                               حملت قلبي من العتب فوق ماطاق
فكري معك دايم لطيفك مخاوي
                               ومن سكرة الحب قلبي مابعد فاق
ولاهي بكاسٍ يشربه كل غاوي
                               رشفة غلا مايرتوي قلب من ذاق
لا والله الا رشفتن هي تداوي
                               قلب العليل اللي به الوجد حراق
للحب لذه في صدر كل هاوي
                              وسكرة غرامي بالشهد حلو الارياق
حبك سرى بالروح ولصدر راوي
                           سري السحاب اللي به الخير منساق
لناض برقا لوى القلب لاوي
                          تطري علي ياشوق للاح براق
ولدارة الافلاك والليل ياوي
                               تاوي على صدري هواجيس واشواق
اقرب القرطاس والحبر ناوي
                            ابيح مكنوني على بيض الاوراق
بنات فكري كلها لك شكاوي
                              اسهر طوال الليل والبال ماراق
بين العرب عايش وكني خلاوي
                            اشوف كل الكون بناظري ضاق
ارحم رحمك الله حبيب مهاوي
                                    ترى الجفا يذبحك لصرت مشتاق